Fiskalizimi

Fiskalizimi përfaqëson procesin e modernizimit dhe digjitalizimit të administrimit tatimor, nëpërmjet regjistrimit, lëshimit dhe raportimit elektronik të faturave dhe transaksioneve. Ky proces synon të sigurojë një administrim më transparent, të saktë dhe efikas të aktivitetit ekonomik, duke mundësuar transmetimin në kohë reale të të dhënave pranë administratës tatimore.

Fiskalizimi kontribuon në rritjen e transparencës, në përmirësimin e kontrollit dhe monitorimit të transaksioneve, si dhe në lehtësimin e përmbushjes së detyrimeve tatimore nga subjektet. Nëpërmjet këtij sistemi, procesi i faturimit dhe raportimit realizohet në mënyrë elektronike, duke reduktuar përdorimin e dokumentacionit fizik dhe duke rritur sigurinë dhe gjurmueshmërinë e informacionit fiskal.

Për bazën ligjore dhe kuadrin rregullator të fiskalizimit, referojuni informacionit të detajuar në linkun përkatës.

Një faturë fiskalizohet duke u lëshuar nëpërmjet një zgjidhjeje software ose pajisjeje të autorizuar, sipas mënyrës së faturimit që përdor subjekti. Të dhënat e faturës regjistrohen dhe transmetohen elektronikisht në sistemin e administratës tatimore, ku fatura pajiset me elementet përkatëse të fiskalizimit. Më pas, fatura i dorëzohet klientit në formatin përkatës dhe ruhet elektronikisht për qëllime të dokumentimit dhe kontrollit tatimor.

Janë të detyruar të përdorin zgjidhjen e certifikuar të software-it, në formën e një aplikacioni individual, të një sistemi kompjuterik të integruar ose të një aplikacioni Cloud, tatimpaguesit që:

• lëshojnë faturë për furnizimin e mallrave dhe të shërbimeve;
• lëshojnë faturë shoqëruese për transportin e mallrave nga një vend në tjetrin në territorin e Republikës së Shqipërisë, pa ndryshim të pronësisë;
• operojnë në sektorë specifikë të biznesit, sipas vendimit përkatës të Këshillit të Ministrave;
• janë banka, institucione financiare jobankare dhe subjekte të tjera që ofrojnë shërbime pagese të faturave elektronike.

Kategoritë që mund të lëshojnë fatura dhe të kryejnë procedurën e fiskalizimit përmes përdorimit të platformës qendrore të faturave, pa pasur nevojën e pajisjes me zgjidhje software-ike, janë:

1. Transaksione me para në dorë

Tatimpaguesit që lëshojnë fatura për transaksione me para në dorë dhe që përmbushin njëkohësisht kriteret si më poshtë:

• nuk kanë përgjegjësinë tatimore të TVSH-së;
• kanë statusin ligjor “Person fizik” dhe kategorinë e punësimit “I vetëpunësuar i vetëm”;
• nuk kanë më shumë se një vendndodhje të ushtrimit të veprimtarisë së biznesit.

2. Transaksione pa para në dorë

Tatimpaguesit që lëshojnë fatura elektronike për transaksione pa para në dorë dhe që përmbushin njëkohësisht kriteret si më poshtë:

• nuk kanë përgjegjësinë tatimore të TVSH-së;
• kanë statusin ligjor “Person fizik” dhe kategorinë e punësimit “I vetëpunësuar i vetëm”;
• nuk kanë më shumë se një vendndodhje të ushtrimit të veprimtarisë së biznesit.

3. Organet publike

Organet publike qendrore dhe vendore.

Në kuadër të informimit të tatimpaguesve lidhur me certifikimin e kompanive të teknologjisë së informacionit dhe me vijimin e përdorimit të pajisjeve fiskale ekzistuese, në zbatim të ligjit nr. 87/2019 “Për faturën dhe sistemin e monitorimit të qarkullimit”, Drejtoria e Përgjithshme e Tatimeve publikon listën e versioneve të pajisjeve fiskale të cilat janë certifikuar në përputhje me procesin e fiskalizimit.

Të gjitha subjektet private në fushën e teknologjisë së informacionit, të interesuara për zhvillimin e zgjidhjeve software-ike në kuadër të projektit të fiskalizimit, mund të aplikojnë online për certifikatë elektronike test në portalin e-Albania, nëpërmjet shërbimit “Aplikim për certifikatë elektronike test”.

Aplikoni në e-Albania

Certifikata elektronike test lëshohet nga Agjencia Kombëtare e Shoqërisë së Informacionit (AKSHI) dhe ka vlefshmëri një vit nga momenti i gjenerimit. Për çdo informacion, mund të kontaktoni në adresën elektronike pki@akshi.gov.al.

Në kuadër të vijimësisë së procesit të fiskalizimit, Drejtoria e Përgjithshme e Tatimeve njofton të gjitha subjektet që veprojnë në fushën e teknologjisë së informacionit për krijimin e komisionit të përbashkët të certifikimit të prodhuesve dhe të mirëmbajtësve të zgjidhjeve software-ike.

Në zbatim të VKM-së nr. 239, datë 20.03.2020, “Për kërkesat teknike dhe funksionale të zgjidhjes software-ike për procedurën e faturimit dhe të fiskalizimit, si dhe procedurën e kriteret për regjistrimin e prodhuesve e të mirëmbajtësve të zgjidhjeve software-ike”, është nënshkruar urdhri i përbashkët ndërmjet Drejtorisë së Përgjithshme të Tatimeve dhe Agjencisë Kombëtare të Shoqërisë së Informacionit për emërimet në komisionin e përbashkët të certifikimit, duke krijuar kështu mundësinë e aplikimit dhe të certifikimit për çdo subjekt të interesuar.

Së bashku me urdhrin e përbashkët është nënshkruar edhe rregullorja e përbashkët për saktësimin e procedurave të certifikimit, e cila qartëson të gjithë hapat e procesit, nga aplikimi deri te marrja e certifikatës. Në zbatim të kësaj rregulloreje, grupi i përbashkët i punës, i përbërë nga specialistë të fushave përkatëse, shqyrton kërkesën e çdo aplikanti, të dhënat dhe dokumentacionin e paraqitur, si dhe vetë zgjidhjen software-ike.

Dokumente të përgjithshme

Specifikime teknike të shërbimit të fiskalizimit

Specifikime funksionale të shërbimit të fiskalizimit

Në zbatim të shkronjës “j”, të nenit 3, të Udhëzimit nr. 20, datë 01.06.2020, “Për elementet bazë dhe teknike, lëshimin dhe shkëmbimin e faturave elektronike dhe faturave shoqëruese”, Drejtoria e Përgjithshme e Tatimeve njofton të gjitha subjektet e interesuara në fushën e teknologjisë së informacionit për publikimin e specifikimeve teknike të faturës elektronike.

Dokumentet janë hartuar sipas standardit të Bashkimit Evropian, në shoqërim të Direktivës 2014/55/BE, datë 16 prill 2014, “Për faturimin elektronik në prokurimin publik”, dhe janë në përputhje me kërkesat procedurale e teknike të kuadrit ligjor e nënligjor të fiskalizimit. Specifikimet bazë të publikuara janë:

• specifikimet për përdorimin bazë të faturës elektronike UN/CEFACT – Fatura ndërindustriale (skemat XML 16B);
• specifikimet për përdorimin bazë të faturës elektronike – ISO/IEC 19845:2015 (UBL 2.1).

Më poshtë gjenden gjithashtu specifikimet funksionale dhe teknike të shërbimit të faturës elektronike, të hartuara mbështetur në specifikimet bazë të Bashkimit Evropian. Të gjitha këto materiale shërbejnë për zhvillimin e zgjidhjeve software-ike për fiskalizimin e faturave elektronike.

Standardi evropian EN 16931

Shërbimi i faturës elektronike

Në zbatim të nenit 37 të ligjit nr. 87/2019 “Për faturën dhe sistemin e monitorimit të qarkullimit”, bankat, institucionet financiare jobankare dhe subjektet e tjera që ofrojnë shërbime pagese pa para në dorë për faturat elektronike regjistrojnë dhe raportojnë pranë administratës tatimore, në fund të çdo dite, pagesat e procesuara për këto fatura.

Me qëllim automatizimin e procesit të pagesave, së bashku me faturën elektronike vihet në dispozicion të tatimpaguesve edhe urdhërpagesa elektronike, e cila lehtëson dhe automatizon ndjeshëm veprimtarinë e përditshme të subjekteve.

Në kuadër të detyrimit për raportimin e pagesave, Drejtoria e Përgjithshme e Tatimeve publikon dokumentin “Shërbimi i e-Faturës për pagesat”, si dhe dokumentet funksionale shoqëruese për krijimin e shërbimit web. Materialet ndihmëse të përfshira në dokumentin teknik janë:

• eInvoice service – Technical v01;
• XMLdsig core schema;
• eInvoice-Bank-service;
• GetPaymentOrderRequest;
• GetPaymentOrderResponse;
• PaymentNotificationRequest;
• PaymentNotificationResponse.

Këto materiale u vihen në dispozicion institucioneve që ofrojnë shërbime pagese pa para në dorë, me qëllim zhvillimin e shërbimeve web për raportimin e pagesave të kryera gjatë ditës për faturat elektronike (B2B dhe B2G). Administrata tatimore inkurajon të gjitha palët e përfshira të zbatojnë detyrimet ligjore dhe teknike që u ngarkohen nga kuadri ligjor në fuqi.

Dokumentet teknike dhe funksionale